Wazoo Ka Masnoon Tareeqa

 

Wuzoo Ka Masnoon Tareeqa Hadees Nabwi Ke Mutabiq Yeh Hai :

Hazrat Syeduna Imam Hussain Razi Allah Anho Se Marwi Hai Ki Mere Waalid e Muhtarm Hazrat Syeduna Moula Ali Bin Abi Taalib Razi Allah Anho Ne Mujh Se Wuzoo Ka Pani Talab Farmaya. Mein Ne Wuzoo Ka Pani Laa Kar Haazir e Khidmat Kiya. Aap Razi Allah Anhu Ne Wudu Farmana Shuroo Kiya. Aap Razi Allah Anho Ne Pani Mein Haath Daalne Se Qabal Dono Hathon Ko Teen Dafaa Dhoya.

Us Ke Baad Teen Martaba Kulli Farmai Aur Teen Dafaa Naak Saaf Farma-i Us Ke Baad Aap Ne Munh Ko Teen Dafaa Dhoya Phir Aap Ne Dayen Haath Ko Kohni Tak Teen Martaba Dhoya Phir Bayen Haath Ko Isi Terhan Dhoya Phir Aap Ne Apne Sir Mubarak Par Aek Dafaa Maseh Farmaya. Us Ke Baad Dayen Paon Ko Takhnon Tak Teen Dafaa Dhoya Phir Aise Hi Bayen Ko Is Ke Baad Aap Ne Khade Ho Kar Pani Laane Ka Hukum Sadir Farmaya. Mein Ne Bartan Jis Mein Wudu Ka Bacha Huwa Pani Tha,

Haazir e Khidmat Kiya To Aap Ne Khade Khade Is Se Pani Pi Liya. Mein Hairan Huwa To Phir Aap Ne Mujhe Dekh Kar Irshad Farmaya :' ' Hairan Nah Hooh Kyunki Mein Ne Aap Ke Nana Jaan Ko Aise Hi Karte Huwe Dekha Jaise Tum Mujhe Karta Dekh Rahe Ho. Huzoor Nabi Akram ﷺ Isi Terhan Wudu Farmate Aur Aap Wudu Ka Bacha Huwa Pani Khade Ho Kar Peete The.' '(Nisai Al Sunan 1:51-52 Al Hadith 95)

Wazu Karne Ka Sunnat Tariqa

(1) Bismillah Padhna

Jab Wazu Karne Ka Irada Kare To Sab Se Pehle (Bismilla-Hirrahmanir-Rahim) Padh Le Tab Wazu Karna Shuru Karen. Jab Tak Ba Wazu Rahenge Farishte Nekiyan Likhte Rahenge. (Al Muazam Al Sagheer Lil Tabrani 01:73 Al Hadith 184)

(2) Hathon Ko Gatte Tak Dhona

Phir Dono Haatho Ko Gatto Tak(Kalaiyon) Teen Martaba Dhoye.

(3) Miswak Karna

Phir Miswak Kar Ke Right Hand Se 3 Baar Kulli Kare Apne Halaq Aur Daanton Ko Acchi Tarah Saaf Kare,Agar Daant Ya Taali Me Koi Cheez Chipki Ho To Usko Saaf Kare. Imam Ghazil Alaihirrahmah Farmate Hain Ki Miswak Karte Waqt Allah TaAla Ke liye Zikr Aur Quran e Kareem Padhne Ki Niyat Honi Chahiye. (Ahyaul Uloom 1:182)

 (4) Naak Me Paani Dalna

Phir Dahine Haath Se 3 Baar Naak Me Pani Dale Pani Yahan Tak Ko Dale Ki Naak Ki Naram Haddi Tak Paani Pahunch Jaye Phir Bayein(Left) Hand Ko Choti Ungli Se Naak Saaf Kare .

(5) Chehre Ko Dhona

Uske Baad Dono Hathon Me Paani Lekar 3 Baar Is Tarah Se Dhoye Ki Baal Ke Ugne Ki Jagah Se Lekar Thody Tak Dahini Kanpati Aur Bayien Kanpati Tak Koi Jagah Chootne Na Paaye. Aur Dadhi Ka Khilal Kare Yani Dadhi Me Ungliyan Daal Kar Bahar Ki Taraf Kheenche Taqi Pani Andar Tak Chala Jaye.

Note :-Agar Ihraam Bandhe Huye Ho To Dhadhi (Beard) Me Khilal Na Kare.

 

(6) Kuhniyon Sameet Haath Dhona

Phir Kuhniyon Sameet Ya Kuch Upar Tak Dono Hathon Ko 3 Teen Baat Acchi Tarah Dhoye.

(7) Masah Karna

Phir 1 Baar Masah Kare Masah Is Tarah Ki Dono Haat Paani Se Tar Karke Angoothe Aur Kalme Ki Ungli Chhod Kar Dono Hathon Ko Teen Teen Ungliyon Ki Nok Ek Dusre Se Milaye Aur Poori 6 Ungliyon Ke Pet Ki Jad Maathe Per Rakh Kar Piche Guddi Tak Le Jaye Aur Is Tarah Karen Ki Kalme Ki Dono Ungliyan Aur Dono Angoothe Aur Hatheli Sir Per Na Lagne Paaye.Ab Guddi Se Haath Wapis Maathe Ki Taraf Is Tarah Layen Ki Dono Guddiyan Sar Ke Dahini Aur Bayien Hisse Per Se Hoti Hui Maathe Tak Wapis Aajaye.Ab Kalme Ki Ungli Ke Pet Se Kaan Ke Andar Ke Hisso Kaa Aur Angoothe Ke Pet Se Kaan Ke Upar Ka Masah Kare.Aur Ungliyon Ki Peeth Se Gerdan Ka Masah Kare Lekin Haath Gale Per Na Jaye Kyunki Gale Ka Masah Karna Makrooh Hai.

(8) Dono Pairon Ko Dhona

Masah Karne Ke Baad Ab Dahina Pair Ungliyon Ki Taraf Se Takhne Tak Dhoye Rakhne Ke Saath Kuch Uper Tak Dhoye ,Phir Isi Tarah Bayaan Pair Bhi Dhoye, Haath Aur Pair Ki Ungliyon Me Khilal Kare .Ab Wazu Kahtam Huwa. (Dur Mukhtar/ Raddul Muhtar/ Bahar e Shariat/Anwar e Shariat Page 20-21)