حضرت علامہ مولانا مفتی سید محمد افضل حسین مونگیری علیہ الرحمہ

 

نام و نسب: بحر العلوم حضرت علامہ مولانا مفتی سید محمد افضل حسین رضوی بن میر سید حسن بن میر سید جعفر علی میر سید خیرات علی بن میر سید منصور علی۔(علیہم الرحمہ)

تاریخ ولادت: ہندوستان کے علاقے بورنا (صوبہ بہار) میں 14/رمضان المبارک1337ھ؍13/جون1919، ء بروز جمعۃ المبارک صبح صادق کے وقت ولادت ہوئی۔

تحصیل علوم: آپ نے درس نظامی کی کتب متداولہ مدرسہ فیض الغرباء آرہ صوبہ بہار، شمس العلوم بدایوں اور جامعہ رضویہ منظر اسلام بریلی شریف میں حضرت مولانا محمد اسماعیل آروی، حضرت مولانا محمد ابراہیم آروی، حضرت مولانا محمد ابراہیم آروی، حضرت مفتی محمد ابراہیم سمستی پوری، حضرت مولانا مفتی ابرار حسین، حضرت مولانا احسان علی مظفر پوری اور شیخ المحدثین علامہ مولانا مفتی نور الحسین مجددی رامپوری شارح قاضی مبارک سے پڑھنے کے بعد شعبان 1359ھ؍ ستمبر 1940ء میں جامعہ رضویہ منظر اسلام بریلی شریف سے سند فراغت حاصل کی۔

بیعت و خلافت : جمادی الاخریٰ 1367ھ؍اپریل 1948ء میں حضور مفتی اعظم ہند مولانا محمد مصطفیٰ رضا نوری بریلوی کے دست حق پرست پر سلسلہ عالیہ قادریہ میں بیعت کا شرف حاصل کیا اور 1372ھ؍1953ء میں حضور مفتی اعظم نے جمیع سلاسل طریقت اور تمام اوراد و وظائف کی اجازت دے کر خلافت سے مشرف فرمایا۔

سیرت و خصائص: بحر العلوم مفتی سید محمد افضل حسین مونگیری علیہ الرحمہ ایک بلند پایہ محقق، بے مثال مفتی اور علم و عرفان کا منبع تھے۔ آپ علیہ الرحمۃ کی علمی شخصیت جو بیک وقت علمی طبقہ میں محدث و مفسر ،فقیہ العصر، متکلم و محقق، مصنف و مدقق اور عملی طبقہ میں صاحب تدبر اور صائب الرائے تسلیم کیے جاتے تھے۔ آپ کی ذات شریعت و طریقت کا حسین میل جول تھی۔آپ وہ پر وقار شخصیت تھے کہ ہر دیکھنے والا اپنے سینے میں ٹھنڈک پاتا تھا ،اور ایک مرتبہ ملاقات کرنیوالا بار بار ملنے کی تمنہ رکھتا، اور ایسا کیونکر نہ ہو تا کہ یہ تمام فیض شہزادۂ اعلیٰ حضرت مفتی اعظم علیہ الرحمہ سے شرف تلمذ اور خلافت کی شکل میں حاصل ہوا تھا۔

علمی قابلیت : آپ کی علمی صلاحیت و وقار کی اس سے بڑی دلیل اور کیا ہوسکتی ہے کہ آپ فراغت کے فوراً بعد جامعہ رضویہ منظر اسلام بریلی شریف میں منصب افتاء پر فائز ہوئے۔ بعد ازاں تدریسی فرائض بھی انجام دینے شروع کردیئے۔ جامعہ میں آپ نے شیخ الحدیث، صدر مدرس اور مفتی کی حیثیت سے کام کیا۔ اس کے ساتھ عملی زندگی میں بھی بھر پور حصہ لیا۔ آل انڈیا سنی کانفرنس ، تحریک پاکستان اور بالخصوص آپ کی تحریری خدمات کو ہمیشہ یاد رکھا جائیگا۔

اساتذہ و شیوخ:

·      حضرت مفتی محمد ابراہیم فریدی سمستی پور ی علیہ الرحمہ

·      حضرت مولانا احسان علی مظفرپوری  علیہ الرحمہ

·      حضرت مفتی ابرار حسین  علیہ الرحمہ

·      شارح قاضی مبارک حضرت مفتی نور الحسن مجددی رامپوری  علیہ الرحمہ

·      حضرت مولانا محمد ابراہیم آروی  علیہ الرحمہ

·      حضرت مولانا محمد اسماعیل آروی  علیہ الرحمہ

تلامذہ  وشاگرد:

·      حضرت ریحان رضا خان بریلوی  علیہ الرحمہ

·      تاج الشریعہ حضرت مولانا مفتی محمد اختر رضا خان ازہری  علیہ الرحمہ

·      حضرت علامہ محمد ابراہیم خوشتر صدیقی  علیہ الرحمہ

·      شیخ الحدیث حضرت مولانا مفتی ابو الخیر محمد حسین قادری  علیہ الرحمہ  

·      فقیہ العصر حضرت مفتی محمد ابراہیم القادری علیہ الرحمہ  

·      حضرت پروفیسر جلال الدین احمد نوری  علیہ الرحمہ

·      عمدةالمحققین مولانا بدر الدین احمد رضوی  علیہ الرحمہ

·      حضرت مولانا مظفر حسین رضوی بہری  علیہ الرحمہ

·      حضرت مفتی محمد احمد جہانگیر خان رضوی  علیہ الرحمہ

·      حضرت مولانا عبد اللطیف غزنوی  علیہ الرحمہ

·      حضرت شیر علی قندہاری رحمۃ اللہ علیہ

تصانیف  وتالیف :

·      زبدة التوقیت علم توقیت

·      توضیح الافلاک علم ہیئت

·      معیار التقویم علم توقیت

·      نعیار الاوقات علم توقیت

·      مساحة الدائرة و البراہین الہندسیہ علی مقادیر الخطوط العشرہ

·      مصباح السلم شرح سلم

·      گھڑیاں اور ان کے اوقات کی کہانی

·      معین البیب فی حل شرح التہذیب

·      مفتاح التہزیب

·      اسلعی المشکور فی بحث الشک و المشہور

·      تعلقات علی القطبی

·      عمدةالفرائض فقہ

·      مرقاة الفرائض فقہ

·      عید میلاد اور چراغاں

·      وصیت کے مسائل عسیرہ کا حل بطریق جبر و مقابلہ

·      رد خلافت یزید

·      منظر الفتاویٰ

·      مصباح المنطق

·      زبدةالقواعد

·      وقایۃالنحو فی ہدایۃ

·      الجواہر الصافیہ من من فوائد الکافیہ

·      منار التوقیت

·      میزان الدائر و البسیر

·      ہدایۃالحکمة

·      ہدایۃالمنطق

·      توضیح الحجة الاولی

·      التوضیح المنیر فی مبحث الثناة بالتكرير

·      تکمیل الصرف

·      ہدایۃالصرف

·      دراسۃالنحو

·      ہدایۃ النحو

·      البیان اسلامی فی شرح ديباجة الجامي

·      التوضیح المقبول فی في الحاصل و المحصول

·      القول الاسلم فی مبحث الحسن و القبح من السلم

·      ترجمہ عبد الرسول شرح مئة عامل منظوم

·      صبح و شفق

·      احسن الفتاوی

·      احسن الاحادیث فی تعد و التلامیذ

وصال پر ملال: 20 رجب المرجب 1402ہجری، بمطابق 1982ء کو آپ کا وصال ہوا۔آپ کی مزارمبارک پرانہ سکھر کے مشہور بابن شاہ قبرستان میں ہے۔

حضرت علامہ محمد عبد الحکیم جوش صدیقی اشرفی علیہ الرحمہ

 

اسم گرامی: محمد عبد الحکیم ۔

 لقب: نجیب مصطفیٰ ۔

 خطاب: حکیم اللہ شاہ ۔

ولادت باسعادت: قائد ملت اسلامیہ حضرت امام شاہ احمد نورانی صدیقی علیہ الرحمہ کے دادا حضور، نجیب مصطفیٰ حضرت علامہ شاہ محمد عبد الحکیم جوؔش صدیقی میرٹھی علیہ الرحمہ میرٹھ میں پیدا ہوئے ۔

آپ علیہ الرحمہ میرٹھ کی شاہی مسجد التمش کے امام و خطیب تھے، خود بھی شاعر تھے اور معروف شاعر مولانا محمد اسماعیل میرٹھی کے بڑے بھائی تھے، درس و تدریس فرماتے تھے ۔

شجرۂ نسب:آپ نسباً صدیقی تھے، حضرت سیدنا محمد بن سیدنا ابو بکر صدیق رضی اللہ عنہما کی اولاد سے تھے ۔

آپ كا شجرۂ نسب یہ ہے:شاہ عبد الحکیم جؔوش و حکیمؔ صدیقی بن شیخ پیر بخش بن شیخ غلام احمد بن مولانا محمد باقر بن مولانا محمد عاقل بن مولانا محمد شاکر بن مولانا عبد اللطیف بن مولانا یوسف بن مولانا داؤد بن مولانا احمد بن مولانا قاضی صوفی حمید الدین صدیقی خجندی بن حضرت منصور خجندی (رحمۃ اللہ علیہم) ۔(‘‘حیات اسماعیل ‘‘، ص۳۰؛ دستی تحریر علامہ محمد بشیر صدیقی علیہ الرحمۃ)

تاریخ ولادت:حضرت شاہ عبدالحکیم جوش صدیقی کے فرزند ارجمند حضرت علامہ محمد بشیر صدیقی علیہ الرحمۃ لكھتے ہیں:راقم آثم ابو یحییٰ محمد بشیر الصدیقی عرف غلام مصطفیٰ (۱۳۰۰ھ)، ۱۳ جمادی الاخریٰ ۱۳۰۰ھ بروز سہ شنبہ (منگل) صبح صادق كے وقت ۲۱؍ مارچ ۱۸۸۳ع كو عالم وجود میں آیا ۔ اُس روز حضرت والد صاحب قبلہ علیہ الرحمہ كی عمر شریف بحساب قمری پورے پچاس (۵۰) سال كی تھی ۔ ‘‘(دستی تحریر علامہ محمد بشیر صدیقی علیہ الرحمہ)

اس سے معلوم ہوتا ہے كہ حضرت شاہ عبد الحكیم جؔوش صدیقی كی ولادت باسعادت ۱۲۵۰ہجری میں ہوئی تھی؛ نیز، حضرت بشیر نے دوسرے مقام پر صراحت كے ساتھ، آپ كا سال ولادت: ’’ ۱۲۵۰ھ ‘‘ لكھا بھی ہے ۔( دستی تحریر علامہ محمد بشیر صدیقی علیہ الرحمہ)

لہٰذا، علامہ محمد بشیر صدیقی علیہ الرحمۃ كی دستی تحریركے مطابق حضرت شاہ عبدالحكیم جؔوش صدیقی كی تاریخ ولادت: ’’ ۱۳ جُمادی الاخریٰ ۱۲۵۰ھ ‘‘ ہے؛ اور آن لائن كیلنڈر كے مطابق’’ ۱۳ جُمادی الاخریٰ ۱۲۵۰ھ ‘‘ كو عیسوی تاریخ: ’’ ۱۷ اكتوبر ۱۸۳۴ء ‘‘ تھی اور دن تھا جمعۃ المبارك ۔اس طرح حضرت حكیم كی مكمل تاریخ ولادت یہ ہوئی:"جمعۃ المبارك، ۱۳ جُمادی الاخریٰ ۱۲۵۰ھ مطابق ۱۷ اكتوبر ۱۸۳۴ء "
بیعت و خلافت:حضرت شاہ عبد الحکیم صدیقی کو حضرت سیدنا سید غوث علی شاہ قلندر پانی پتی رضی اللہ عنہ سے شرف بیعت و خلافت حاصل تھا؛ علاوہ ازیں، حضرت حاجی امداد اللہ مہاجر مکی  اور محبوب ربانی ہم شبیہ غوث الاعظم حضرت سید شاہ علی حُسین اشرفی الجیلانی عرف اعلیٰ حضرت اشرفی میاں  کچھوچھوی رحمۃ اللہ تعالٰی علیہما ایسی بلند ہستیوں سےبھی آپ كو شرف خلافت حاصل تھا۔

محبوب ربانی ہم شبیہ غوث الاعظم حضرت سید شاہ علی حُسین اشرفی الجیلانی عرف اعلیٰ حضرت اشرفی میاں  کچھوچھوی علیہ الرحمہ کےپانچ خلفا: شاہ عبدالحکیم اور اُن کے4 فرزند:

علامہ شاہ محمود احمد قادری رفاقتی کان پوری علیہ الرحمہ رقم طراز ہیں:"حضرت مولانا شاہ عبد الحکیم صدیقی علیہ الرحمۃ شاعر بھی تھے اور ’’حکیم‘‘ اور ’’جوش‘‘ تخلص کرتے تھے۔ ان کو بیعت  ارادت کا شرف حضرت حاجی شاہ امداد اللہ مہاجر مکی علیہ الرحمۃ سے حاصل ہوا تھا۔ حضور پُرنور حضرت مخدوم الاولیا (حضرت شاہ علی حسین اشرفی میاں) علیہ الرحمۃ کی شرف زیارت سے مشرف ہوئے تو طالب ارشاد ہوئے، عقیدت و محبت اور تعلق قلبی نے رنگ جمایا تو حضور نے حلق راس کر ا کر خلافت و اجازت سے سرفراز فرمایا؛ حضور پُر نور کے حکم سے خلفائے کرام کی فہرست (ب)، جو طبقۂ علما کے ساتھ مخصوص ہے، حضرت مولانا شاہ عبد الحکیم کا نام نامی پہلے نمبر پر درج ہوا۔ اس فہرست میں درج ذیل الفاظ ہیں:"مولانا مولوی عبد الحکیم صاحب خجندؔی المخاطب بہ ’حکیم اللہ شاہ‘، محلہ مشائخاں (کو) بعطائے تاج دلق و مثال خلافت و عمل مقراض جمیع سلاسل عطا فرمائی گئی۔ ۲۷؍ ذی قعدہ ۱۳۲۳ہجری‘۔‘‘[4]
محبوب ربانی ہم شبیہ غوث الاعظم حضرت سید شاہ علی حُسین اشرفی الجیلانی عرف اعلیٰ حضرت اشرفی میاں  کچھوچھوی رحمۃ اللہ تعالٰی علیہما کے خلفائے کرام کی جو فہرست طبقۂ علما سے مخصوص ہے اُس کے سرفہرست یعنی سب سے پہلے حضرت شاہ عبد الحکیم صدیقی کام نام مبارک اس طرح درج ہے:"مولانا مولوی عبد الحکیم صاحب خجندی المخاطب بہ ’حکیم اللہ شاہ‘، محلہ مشائخاں (کو) بعطائے تاج دلق و مثال خلافت و عمل مقراض خلافت جمیع سلاسل عطا فرمائی گئی۔ ۲۷؍ ذی قعدہ ۱۳۲۳ہجری میں مُجاز و ماذون فرمائے گئے۔(حیات مخدوم الاولیاء محبوب ربانی ‘‘، ص ۳۱۰)

پھر آگے چل كر، اسی فہرست میں حضرت شاہ عبد الحکیم صدیقی علیہ الرحمۃ کا اسم مبارک دوبارہ یوں مذکور ہے:"مولوی عبد الحکیم المخاطب بہ ’حکیم اللہ شاہ‘ ۲۷ ذی القعدہ شاہ جہاں پور، ضلع میرٹھ، مدرس اول مدرسۂ حنفیہ ، قصور، لاہور ۔ (حیات مخدوم الاولیاء محبوب ربانی ‘‘، ص ۳۱۰)

 حکیم اللہ شاہ ‘‘ کا خطاب:مندرجۂ بالا اقتباسات سے معلوم ہوا کہ حضور اشرفی میاں کچھوچھوی علیہ الرحمہ  نے حضرت شاہ عبد الحکیم صدیقی علیہما الرحمۃ کو ’’حکیم اللہ شاہ‘‘ کےخطاب سے نوازا  تھا۔

حضرت شاہ عبدالحکیم صدیقی کے چارفرزندان گرامی (مبلغ اسلام حضرت  علامہ شاہ احمد مختار صدیقی، علامہ محمد بشیر صدیقی، علامہ نذیر احمد خجندی اور مبلغ اسلام علامہ شاہ محمد عبد العلیم صدیقی میرٹھی مدنی علیہم الرحمۃ) بھی حضور اشرفی میاں سے شرف خلافت رکھتے تھے، جس سے متعلق عبارات چوتھے (بیعت اور اجازت و خلافت) اوردسویں باب (بہن بھائی) میں نقل کی جائیں گی ۔

اولاد امجاد:آپ کے سات بیٹے اور سات ہی بیٹیاں تھیں ۔ سات بیٹوں میں سے مندرجہ ذیل چار فرزندان گرامی نے آفاقی شہرت پائی: مبلغ اسلام حضرت علامہ شاہ احمد مختار صدیقی، الحاج علامہ محمد بشیر صدیقی، علامہ نذیر احمد خجندی اور مبلغ اسلام علامہ شاہ محمد عبدالعلیم صدیقی میرٹھی مدنی ۔ (علیہم الرحمہ)

وصال مبارک:آپ کا وصال 3 جمادی الاُخری کو ہُوا۔  آپ کے سال وصال میں تین روایات نظر سے گزری ہیں: 1322ھ، 1323ھ اور  1324ھ ۔

مزار مبارك:نجیب مصطفیٰ حضرت علامہ شاہ محمد عبد الحكیم جؔوش صدیقی علیہ الرحمۃ كی قبر مبارك احاطۂ چشتی پہلوان شاہ، میرٹھ (ہندوستان) میں واقع ہے ۔( تذكرۂ خانوادۂ علیمیہ، ص۴۱؛ ماہ نامہ ’’پیام حرم‘‘ جمدا شاہی (انڈیا) كا مبلغ  اسلام نمبر، مارچ ۲۰۱۵ء، ص 7 اور 89)

حضرت مولانا ارشاد حسین فاروقی مجددی نقشبندی رامپوری علیہ الرحمہ

آپ علیہ الرحمہ  رامپور کے بزرگ ترین عالم، شیخ طریقت، مصلح اور فقیہ تھے حضرت خواجہ محمد یحییٰ خلف اصغر حضرت امام ربانی مجدد الف ثانی علیہ الرحمہ  سے نسبی تعلق تھا۔

ولادت باسعادت:  آپ علیہ الرحمہ  کی ولادت ۱۴؍ صفر ۱۲۴۸ہجری  میں محلہ پیلا تالاب شہر مصطفیٰ آباد المعروف رامپور یوپی (انڈیا) میں ہوئی۔ اہل علم نے آپ کو تاج المحدثین، سند المحدثین، سراج الفقہاء، شیخ العلماء اور قطب ارشاد جیسے القابات سے نوازا۔ آپ کا خاندانی نسب کچھ اس طرح ہے: ’’مولانا ارشاد حسین بن مولانا حکم احمد حسین بن غلام محی الدین بن فیض احمد بن شاہ کمال الدین بن شیخ احمد بن شیخ زین العابدین عرف میاں فقیر اللہ بن حضرت امام ربانی مجدد الف ثانی شیخ احمد فاروقی سرہندی رحمہم اللہ تعالیٰ اجمعین‘‘ (نزہۃ الخواطر: ٤٩/٨)

تعلیم و تربیت : آپ نے فارسی کی کتب اپنے والد معظم اور بھائی امداد حسین مجددی، شیخ احمد علی اور شیخ واجد علی سے پڑھیں۔ اس کے بعد صرف و نحو مولوی غلام نبی، مولوی جلال الدین اور مولانا نصیرالدین خان سے پڑھی۔ اس کے بعد علماے لکھنؤ بالخصوص مولانا محمد نواب افغانی نقشبندی سے علوم عقلیہ اور باقی کتب کا درس لیا۔( تذکرہ کاملان رام پور، ص ٣٠)

دہلی جا کر حضرت مولانا شاہ احمد سعید مجددی سے مرید ہوئے، اجازت و خلافت سے سرفراز کیے گئے۔ حالات کی ابتری اور ملک پر انگریزی اقتدار و غلبہ اور استبداد و غاصبانہ قبضہ کی وجہ سے حضرت شاہ احمد سعید مجددی نے جب جانب طیبہ ہجرت کا ارادہ کیا تو آپ کو رامپور جانے کا حکم دیا۔ آپ نے اپنے مرشد سے ایک سال تک مدینہ منورہ میں رہ کر اکتساب فیض کیا۔

اعلیٰ حضرت امام اہل سنت امام احمد رضا قادری برکاتی بریلوی آپ کے زہد و تقویٰ کے بڑے مدح تھے۔نیز اعلیٰ حضرت نے آپ کو کئی القاب سے یاد فرمایا۔ حامی سنت حضرت مولانا ارشاد حسین رامپوری کو ”فاضل رامپوری“ کے خطاب سے بھی یاد کیا۔( فتاویٰ رضویہ، جدید، رضا فاؤنڈیشن لاہور، جلد ۱۷،ص ۵۳۲)

مولانا ارشاد حسین مجددی علیہ الرحمہ نے اعلیٰ حضرت امام اہل سنت کی کئی کتب و فتاویٰ پر تصدیقات لکھیں۔ انگوٹھا چومنے کے ثبوت میں اعلیٰ حضرت کی تحقیقی کتاب "منیر العین فی تقبیل الابہامین" پر مولانا ارشاد حسین مجددی کی تصدیق موجود ہے۔

آپ علیہ الرحمہ  کے خلیفہ مولانا دیدار حسین الوری کو اعلیٰ حضرت سے بھی اجازت و خلافت حاصل تھی مولانا الوری نے دیابنہ و رافضیت کے رد میں کئی علمی کتابیں تصنیف کیں۔

آپ علیہ الرحمہ  نے وہابیہ کے رد میں "اشعار الحق" کے عنوان سے کتاب تصنیف کی۔آپ علیہ الرحمہ  کے فرزند مولانا محمد معوان حسین مجددی رامپوری (مدرسہ ارشادالعلوم، رامپور) نے تحفظ ناموس رسالت صلی اللہ علیہ وسلم کے لیے اعلیٰ حضرت علیہ الرحمہ کی اہم تصنیف "حسام الحرمین" کی تصدیق کی؛ لکھتے ہیں:

’’حسام الحرمین کے احکام حسب نقول صحیحہ معتبرہ لازم الاتباع ہیں۔‘‘(الصوارم الہندیہ۱۳۴۵ھ، مرتب مولانا حشمت علی خان قادری، نوریہ رضویہ پبلشنگ کمپنی لاہور،جنوری۲۰۱۱ء، ص۱۰۱)

عظیم بزرگ محبوب ربانی ہم شبیہ غوث الاعظم اعلیٰ حضرت سید شاہ علی حسین اشرفی میاں جیلانی کچھوچھوی علیہ الرحمۃ نے اکابر کے تذکرہ میں آپ کا بھی خاص ذکر کیا ہے فرماتے ہیں:"ہندوستانیوں نے دیکھا کہ بدایوں میں حضرت مولانا عبدالقادر صاحب اور رامپور میں حضرت مولانا ارشاد حسین صاحب اور لکھنؤ میں حضرت مولانا عبدالرزاق صاحب رحمۃاللہ تعالیٰ علیہم وغیرہ وغیرہ اور سر زمین بریلی پر ایک حق گو حق پرست اور حق شناس ہستی (اعلیٰ حضرت) تھی؛ جس نے بلاخوف لومۃ لائم اعلان حق کے لیے میدان جہاد میں قدم رکھ دیا"( ماہ نامہ المیزان،کچھوچھہ، اپریل مئی ١٩٧٢ء، ص٨، بہ حوالہ ماہ نامہ اشرفی مئی١٩٢٥ء)

خدمت دین میں اعلیٰ حضرت کے معین و دوست و محب علامہ شاہ وصی احمد محدث سورتی نقشبندی کی رد وہابیت پر مشہور کتاب "جامع الشواہد" پر مولانا ارشاد حسین رامپوری کی تصدیق موجود ہے ایک مقام پر ارشاد فرماتے ہیں:"بلاشبہہ یہ فرقۂ ضالہ (وہابیہ) مبتدع (بدعتی) ہے اور اس کے حق میں یہی حکم ہے، جو مجیب مصیب نے تحریر کیا واللہ سبحانہ الموفق"( تذکرہ محدث سورتی، خواجہ رضی حیدر، رضا اکیڈمی ممبئی ٢٠١٢ء، ص١٦٣)

وہابیت و غیر مقلدیت کی تردید میں مولانا سید شاہ احمد علی بٹالوی نقشبندی مجددی کی کتاب "نصرالمقلدین فی جواب الظفر المبین" پر مولانا ارشاد حسین مجددی کی تقریظ و تصدیق موجود ہے الغرض! مولانا ارشاد حسین مجددی رامپوری نے دین کی حمایت و نصرت کے لیے مثالی خدمت انجام دی عقائد اہل سنت کے تحفظ کے لیے زبردست کام کیا اور گلشن سُنیت تازہ ہو گیا ۔

آپ کے شاگردوں کا سلسلہ بہت وسیع ہے؛ جن میں سے آپ کے فرزند اکبر احسان حسین مجددی، سید دیدار علی قادری امیر انجمن حزب الاحناف لاہور، مولانا ریاست علی خان شاہجہانپوری، سید شجاعت علی رامپوری، ظہور حسین فاروقی نقشبندی رامپوری سابق صدر (مدرس) دارالعلوم منظراسلام بریلی، محمد عبدالجلیل غفران رامپوری، پروفیسر سید فدا علی رامپوری، سید محمد گوہر علی، مفسر قرآن علی عباس خان رامپوری، مولوی شبلی نعمانی مؤلف سیرت النبی، قاضی القضاۃحفیظ اللہ خان رامپوری، نائب مجسٹریٹ جے پور سراج الدین احمد خان رامپوری۔ (تذکرہ علماء اہل سنت، ص١٧٤)

وصال پر ملال: آپ علیہ الرحمہ کا وصال دو شنبہ ۱۵؍جمادی الاخریٰ ۱۳۱۱ہجری میں ہوا۔