Sarwar e Kayinat Huzoor Ahmad e Mujtaba Muhammad Mustafa ﷺ

 Huzoor Imam ul Awliya, Sarwar e Anbiya, Baais e Ijaad e Aalam, Fakhr e Maujudat, Mehboob e Rabbul Aalameen, Rahmat ul lil Aalameen, Shafi ul Muznibeen, Manba e Faiz e Anbiya Wa Mursaleen, Ma'dan e Uloom e Awwaleen Wa Aakireen, Waseeta e Par Fazl o Kamal, Mazhar e Par Husn o Jamaal Aur Khalifa e Mutlaq Wa Naaib e Kul Hazrat e Baari Ta'ala Jalla Jalaluhu Ke Hain. 

 Aap ﷺ Ka Nasab Shareef:

Huzoor Syedna Muhammad ﷺ Bin Abdul Allah Bin Abdul Muttalib Bin Hashim Bin Abdul Manaf Bin Qusai Bin Kilab Bin Murrah Bin Kaab Bin Luwai Bin Ghalib Bin Fihr Bin Maalik Bin Nadhir Bin Kinanah Bin Khuzaimah Bin Mudrikah Bin Ilyas Bin Mudar Bin Nizaar Bin Maad Bin Adnan Aur Walida Maajida Ki Taraf Se Huzoor Ka Shajra Shareef Ye Hai: Hazrat Muhammad ﷺ Bin Aaminah Bint Wahb Bin Abdul Manaf Bin Zuhrah Bin Kilab Bin Murrah.  (Sahih Al Bukhari) 

Kunniyat:                 Abu Al Qasim.

Walida Ka Naam:    Aaminah Bint Wahb. 

Wiladat:                  Baroz Dushanba 12/ Rabi ul Awwal Aam ul Feel.

Walid e Majid Ka Inteqaal Wiladat Se Qabal Hi Bahalat e Safar Madina Munawwarah Mein Ho Chuka Tha. Aap ﷺ Ki Kifalat Aap Ke Dada Abdul Muttalib Ne Ki Aur Haleema Sa’diyah Ne Doodh Pilaya. Phir Jab Aap ﷺ Ki Umar Mubarak 6 Saal Ki Hui To Aap Ki Walida Maajida Aap Ko Madina Aap Ke Nanhaal Le Gayi, Wapsi Mein Ba Maqam Abwa Unka Inteqaal Hua Aur Aap ﷺ Ki Parwarish Umm e Aiman Ke Supurd Hui. Jab Aap 8 Saal Ke Hue To Dada Ka Saya Bhi Sar Se Uth Gaya, Kifalat Ka Zimma Aap Ke Chacha Janab e Abu Talib Ne Liya. 9 Saal Ki Umar Mein Chacha Ke Saath Shaam Ka Safar Kiya. Aap ﷺ Yateem Paida Hue The Aur Mahol Wa Muashra Sara But Parast Tha; Magar Aap Baghair Kisi Zaahiri Taleem Wa Tarbiyat Ke Na Sirf Un Tamaam Aalaishon Se Paak Saaf Rahe; Balke Jismani Taraqqi Ke Saath Saath Aqal Wa Fehm Aur Fazl o Kamal Mein Bhi Taraqqi Hoti Gayi; Yahan Tak Ke Sab Ne Yaksa Wa Yak Zubaan Ho Kar Aap Ko Sadiq Wa Ameen Ka Khitaab Diya. Bachpan Mein Chand Qiraat Par Ahl e Makkah Ki Bakriyan Bhi Charayi; Aur 25 Saal Ki Umar Mein Shaam Ka Dosra Safar Hazrat Khadijatul Kubra رضی اللہ عنہا Ki Tijarat Ke Silsile Mein Kiya Aur Is Safar Se Wapsi Ke Do Maah Baad Hazrat Khadijatul Kubra رضی اللہ عنہا Se Aqd Hua. 35 Saal Ki Umar Mein Quraish Ke Saath Tameer e Kaaba Mein Hissa Liya Aur Pathar Dhoiye, Hajar e Aswad Ke Baare Mein Quraish Ke Uljhe Hue Jhagde Ka Hakeemana Faisla Kiya Jis Par Sabhi Khush Ho Gaye. Baad Mein Aap Ko Khalwat Pasand Aayi; Chunanchah Ghaar e Hira Mein Kai Kai Raatein Ibadat Mein Guzar Jaati Thi. 

Ailan e Nabuwat Se Pehle Aap ﷺ Sachay Khwab Dekhnay Lage, Khwab Mein Jo Dekhte Wohi Hota. Jab Umar Mubarak 40 Ko Pahunchi To Allah Ta'ala Ne Aap Ko Ailan e Nabuwat Ka Hukm Diya, Aap ﷺ Ghaar e Hira Mein The Ke Jibreel علیہ السلام Surah Iqra Ki Ibtidaai Ayatain Le Kar Naazil Hue. Us Ke Baad Kuch Muddat Tak Wahi Ki Aamad Band Rahi, Phir Lagataar Aane Lagi. Wahi Asmani Aap Tak Pahunchane Ke Liye Jibreel e Ameen علیہ السلام Ka Intikhab Hua Jin Ko Hamesha Se Ambiya علیہم السلام Aur Baari Ta'ala Ke Darmiyan Waseeta Ban ne Ka Sharaf Haasil Tha Aur Jin Ki Sharafat, Quwwat, Azmat, Buland Manzilat Aur Amanat Ki Khud Allah Ne Gawahi Di Hai.  Is Wahi e Ilahi Ki Roshni Mein Aap ﷺ Ki Aisi Tarbiyat Hui Ke Aap ﷺ Har Aitbaar Se Kaamil Ban Gaye. Aur Aap ﷺ Ki Zindagi Ka Har Pehlu Ummat Ke Liye Ek Behtareen Uswah Hasanah Ban Kar Samnay Aaya. Ummat Ke Har Fard Ke Liye Bil Khusoos Aam Logon Ke Liye Bhi Aap ﷺ Ki Hayaat Wa Zaat Mubarakah Ek A'la Misaal Hai, Jise Wo Samne Rakh Kar Zindagi Ke Har Shobay Mein Mukammal Rehnumai Haasil Kar Saktay Hain. 

Pehla Daur: Teen Baras Tak Huzoor ﷺ Poshida Tor Par Aur Raazdaari Ke Saath Da'wat Wa Tableegh Ka Fareeza Ada Farmaate Rahe, Is Darmiyan Mein Sabse Pehle Ibtidaai Da'wat Par Auraton Mein Hazrat Khadijatul Kubra رضی اللہ عنہا, Mardon Mein Hazrat Abu Bakr Siddiq رضی اللہ عنہ, Bachon Mein Hazrat Ali رضی اللہ عنہ, Azaad Shuda Ghulamon Mein Hazrat Zaid Bin Harithah رضی اللہ عنہ Aur Ghulamon Mein Hazrat Bilal رضی اللہ عنہ Sab Se Pehle Imaan Laye, In Ke Baad Bohat Se Azaad Aur Ghulam Is Daulat Se Bahra Mand Hue. Sab Se Pehle Islam Laanay Wale Jo Sabiqeen e Awwaleen Ke Laqab Se Sarfaraz Hue. 

Dosra Daur: Teen Saal Ke Baad Is Khufia Da'wat Se Musalmanon Ki Ek Jamaat Tayyar Ho Chuki Thi, Is Ke Baad Allah Ta'ala Ne Aap ﷺ Par Surah Shoara Ki Ayat e Mubarakah Naazil Farmaayi: Wa Andhir A'sheerataka Al Aqrabeen. Aap ﷺ Ko Alania Da'wat Wa Tableegh Ka Hukm Hua Chunanchah Aap ﷺ Ne Koh e Safa Ki Choti Par Khade Ho Kar Qabeela Quraish Ko Pukara. Jab Sab Quraish Jama Ho Gaye To Aap ﷺ Ne Irshaad Farmaya Ke Tumhain Allah Ke Azaab Se Darta Hoon Agar Imaan Nahi Lao Gay To Tum Par Azaab e Ilahi Utaray Ga. Tamaam Qaum Ko Sirf Allah Ta'ala Ki Ibaadat Karne Aur But Parasti Chhodne Ki Puri Quwwat Se Da'wat Di. Yeh Sun Kar Tamaam Quraish Jin Mein Aap Ke Chacha Abu Lahab Bhi Maujood Tha, Sakht Naraaz Hue Aur Shan e Risalat Ka Inkaar Kiya. 

Teesra Daur: Ab Waqt Aagaya Ke Ailan e Nabuwat Ke Chauthe Saal Surah Hijr Ki Ayat: Fasda' Bima Tu'maru Wa A'ridh Anil Mushrikeen Naazil Farmayi Aur Mehboob e Haq ﷺ Ko Yeh Hukm Farmaya Ke Is Da'wat e Haq Ko Alaan e Aama Mein Bayan Farmaiye. Jab Aap Arlaniya Taur Par Deem e Mubeen Ki Dawaat Farmane Lage. Shirk o But Parasti Ki Khullam Khulla Burayi Farmayi. Tamaam Quraish, Ahl e Makkah, Tamaam Kuffar o Mushrikeen Aap Ki Mukhalifat Me Jama Ho Gye Aur Ezaa Rasaniyon Ka Aek Taulani Silsila Shuru Ho Gya. Kuffar e Makkah Khandan Banu Hashim Ke Inteqam Aur Ladai Bharak Uthne Ke Khauf Se Huzoor Sallallahu Alaihi Wa Aalihi Wasallam Ko Qatal Karne Ki Himmat To Na Kar Sake, Magar Tarah Tarah Ki Takaleef Aur Eza Rasaniyon Se Aap Par Zulm O Sitam Ke Pahaad Todne Lage. Har Kocha O Bazaar Mein Propaganda Shuru Kar Diya Kuffar Mushrikeen Ne Aap Par Aur Islam Qabool Karne Wale Musalmanon Par Itne Mazalim Dhaye Ke Jin Ke Tasavvur Se Rooh Kanp Uthti Hai. Kuffar O Mushrikeen Is Baat Par Musir The Ke Musalmanon Ko Itna Tang Karo Ke Wo Islam Ko Chor Kar Phir Shirk O Kufr Mein Mubtala Ho Jayen. Isliye Qatal Karne Ke Bajaye Har Tarah Ke Zulm O Sitam, Sazaon, Aur Eza Rasaniyon Aur Jaansooz Azaabon Ke Sath Sataate The. Magar Khuda Ki Qasam! Mahboob e Khuda Ne Unhein Sharab e Tauheed Ke Wo Jaam Pila Rakhe The Ke In Farzandaan e Tauheed Ne Istiqlal, Istiqamat Ka Wo Manzar Paish Kar Diya Ke Pahadon Ki Chotiyaan Sar Utha Kar Hairat Se In Bala Kashaane Islam Ke Jazba, Quwat e Imani Ke Sath Istiqamat Ka Nazarah Karti Rahin. Be Rehm, Sangdil, Darinda Sifat Kafiron Ne In Ghareeb, Be Kas Musalmanon Par Jabro Karah Zulm O Sitam Ka Koi Daqeeqa Baqi Na Chhoda Magar Ek Bhi Musalman Ke Paaye Istiqlal Mein Tazalzul Nahin Aaya.

          Ailan e Nabuwat Ke Saatwen Saal Kuffar e Makkah Ne Jab Dekha Ke Islam Roz Baroz Phailta Ja Raha Hai To Ghaiz O Ghazab Mein Aapay Se Bahar Ho Gaye. Huzoor Sallallahu Alaihi Wa Aalihi Wasallam Ke Khandan Ke Sath Mukammal Social Boycott Kar Diya Gaya Aur Quraish Ne Banu Hashim Aur Banu Abdul Muttalib Ke Khilaf Ek Muaahida Par Dastakhat Kiye Ke Jab Tak Ye Log Aanhazrat Sallallahu Alaihi Wa Aalihi Wasallam Ko Hamare Hawalay Nahin Karte, Us Waqt Tak In Se Har Qisam Ka Muqata'a Kiya Jayega. Iske Natije Mein Aap Sallallahu Alaihi Wa Aalihi Wasallam Apne Khandan Aur Chacha Abu Talib Ke Sath Shaib e Abu Talib Mein Teen Saal Mehsoor Rahe. Teen Saal Ka Zamana Itna Sakht Aur Kathin Tha Ke Sangdil Aur Zalim Kuffar Ne Har Taraf Pehra Bitha Diya Tha Ke Kahin Se Bhi Ghaati Ke Andar Khanay Peenay Ka Samaan Jane Na Paye. Huzoor Sallallahu Alaihi Wa Aalihi Wasallam Aur Khandan e Banu Hashim In Hosh Ruba Masaaib Ko Jheeltay Rahe.       

Muaahida Ki Dastawaizat Ko Deemak Ne Kha Liya. Hazrat Abu Talib Ne Logon Ko Aagah Kiya Ke Mera Bhatija Kehta Hai, Muaahida Ki Dastawaizat Ko Deemak Kha Gayi Hai, Jahan Khuda Ka Naam Likha Hua Tha Wo Hissa Bach Gaya Hai. Ye Sun Kar Mut'im Bin Adi Kaaba Ke Andar Gaya Aur Dastawaiz Utaar Laaya. Waqai Bajuz Allah Ke Naam Ke Saari Dastawaiz Keeron Ne Kha Li Thi. Iske Baad Ye Muhasra Khatam Hua. Mansur Bin Akrama Jisne Ye Dastawaiz Likhi Thi, Us Par Qahr e Ilahi Toot Pada Aur Uska Haath Shal Ho Kar Naakara Ho Gaya.

Isi Saal Aap Sallallahu Alaihi Wa Aalihi Wasallam Ke Chacha Abu Talib Shaib e Abu Talib Se Nikal Kar Ghar Jab Aaye To Hazrat Abu Talib Shadeed Illat Ke Baad Intiqal Kar Gaye. Chacha Abu Talib Ki Wafat Ke Baad Aap Bohat Maghmoom Rehne Lage Aur Aap Sallallahu Alaihi Wa Aalihi Wasallam Ki Ghamgusar Zaujah Mutahhara Hazrat Khadijah Al Kubra Razi Allah Anha Ki Wafat Hui. Abhi Abu Talib Ke Intiqal Ka Zakhm Taaza Tha Ke Makkah Mein Abu Talib Ke Baad Jis Hasti Ne Rahmat e Aalam Sallallahu Alaihi Wa Aalihi Wasallam Ki Nusrat Aur Himayat Mein Tan, Man, Dhan Sab Kuch Luta Diya Wo Hazrat Khadijah Thi. Jab Duniya Mein Aap Ka Koi Mukhlis O Ghamkhwar Nahin Tha, Ye Dono Hastiyaan Aap Ke Sath Jan Nisaar Aur Madadgar Rahi. Ab Dono Is Duniya Mein Na Rahe. Aap Ke Qalb e Mubarak Par Itna Sadma Guzra Ke Aap Sallallahu Alaihi Wa Aalihi Wasallam Ne Is Saal Ka Naam Aam ul Huzn Rakh Diya. Quraish Ki Eza Rasani Aur Barh Gayi. Aap Sallallahu Alaihi Wa Aalihi Wasallam Ahl e Taaif Ki Tableegh Ke Liye Tashreef Le Gaye, Unhone Ek Bhi Na Suni Balki Ulta Dar Paay Eza Hue. Isliye Ye Saal Aam ul Huzn (Gham Ka Saal) Kahlata Hai.

 11 Nabuwat: Isi Saal Aap Sallallahu Alaihi Wa Aalihi Wasallam Ko Mairaj Hui. Panj Gana Namaz Farz Hui. Aanhazrat Sallallahu Alaihi Wa Aalihi Wasallam Ne Hajj Ke Mauqe Par Arab Ke Mukhtalif Qabail Ko Dawat Di. Chunancha Madina Ke Qabeela Khazraj Ke 6 Aadmi Musalman Hue.

12 Nabuwat: Is Saal Aws Aur Khazraj Ke 12 Afraad Ne Aap Sallallahu Alaihi Wa Aalihi Wasallam Se Bait Ki. Ye Bait Aqaba Oola Kehlati Hai.

 13 Nabuwat: Is Saal Madina Ke 70 Mardon Aur 20 Aurton Ne Aap Sallallahu Alaihi Wa Aalihi Wasallam Se Bait Ki. Ye Bait Aqaba Saniya Kehlati Hai.

 Madina Mein Islam Ki Roshni Ghar Ghar Phail Chuki Thi. Aap Sallallahu Alaihi Wa Aalihi Wasallam Ne Sahaba Kiram Alaihimur Rizwan Ko Hijrat e Madina Ka Hukm Farmaaya. Quraish Ko Pata Chala To Unhon Ne Dar ul Nadwa Mein Aap Sallallahu Alaihi Wa Aalihi Wasallam Ko Qatal Karne Ka Napak Mansooba Banaya Aur Aap Sallallahu Alaihi Wa Aalihi Wasallam Ke Ghar Ka Muhasra Karliya. Allah Ta’ala Ne Unka Ye Mansooba Khaak Mein Mila Diya. Aap Sallallahu Alaihi Wa Aalihi Wasallam Ko Hijrat Ka Hukm Hua. Aap Sallallahu Alaihi Wa Aalihi Wasallam Kafiron Ke Ghere Se Ba Itminan Nikle Aur Hazrat Abu Bakr Razi Allah Anhu Ke Ghar Pahunche, Un Ko Sath Le Kar Ghaar e Thawr Tashreef Le Gaye. Yahan 3 Din Rahe, Phir Hijrat Farmaayi Aur Madina Ki Nawahi Basti Quba Pahunche. Yahan Se Islam Ka Ek Naya Daur Shuru Hota Hai. Quba Mein 14 Din Qayam Raha, Wahan Ek Masjid Banayi. Wahan Se Madina Tayyiba Muntaqil Huye. Hazrat Abu Ayyub Ansari Razi Allah Anhu Ke Ghar Qayam Farmaaya. Masjid e Nabwi Sallallahu Alaihi Wa Aalihi Wasallam Ki Tameer Farmaayi, Azaan Shuru Hui Aur Jihad Ka Hukm Hua.

Huzoor Sallallahu Alaihi Wa Aalihi Wasallam Aur Aap Ke Ashab Apna Sab Kuch Makka Mein Chor Kar Be Sar o Samani Ki Haalat Mein Madina Aaye Thay. Is Par Bhi Kuffar e Makka Raazi Na Huye. Madina Mein Bhi Sukh Ka Sans Na Lene Diya. Ahl e Madina Ke Bhi Jaan Ke Dushman Ho Gaye. Ab Tak Huzoor Sallallahu Alaihi Wa Aalihi Wasallam Ko Allah Ki Taraf Se Ye Hukm Tha Ke Logon Ko Islam Ki Dawat Dijiye Aur Kuffar O Mushrikeen Ki Ezaaon Par Sabr O Tahammul, Bardasht Ka Hukm Tha. Isi Liye Musalmanon Par Kuffar Ne Baday Baday Pahaad Tod Diye Magar Musalmanon Ne Kabhi Apne Difa Mein Hathiyar Nahin Uthaya. Lekin Hijrat Ke Baad Jab Kuffar O Mushrikeen Musalmanon Ke Jani Dushman Ho Gaye Aur Unka Jeena Doobhar Kar Diya, Ab Rab e Zuljalal Ne Musalmanon Ko Ye Ijazat Di Ke Jo Log Tum Se Jung Ki Ibtida Karo Tum Bhi Unse Lar Sakte Ho.

 

Allah Ta’ala Ne Zameen O Aasman (Ya’ni Nizaam e Aalam) Ko Jis Haalat Par Paida Kiya Tha, Zamana Apne Halaat O Waqiyaat Ka Daira Mukammal Karne Ke Baad Phir Us Maqam Par Dobara Aagaya Hai. Goya Zuban e Nabuwat Is Amr Ka Ailan Farma Rahi Thi Ke Nizaam e Aalam Ke Ek Daur Ka Khatma Ho Chuka Hai Aur Aaj Se Doosre Daur Ka Aaghaz Ho Raha Hai Aur Dunya e Insaniyat Ko Nizaam e Aalam Ke Naye Daur Ke Aaghaz Par Khutba Hujjat ul Wida Ke Zariye Bilkhusoos Aur Apni Taleemat O Hidayaat Ke Zariye Bil Umoom Naya Aalmi Nizaam Ataa Kar Raha Hoon. Zaroori Tha Ke Is Mauqe Par Aap Pichlay Nizaam Aur Iske Jahilana Umoor Ko Mansookh Karne Ka Ailan Bhi Farmate, So Irshaad Farmaaya: “Khabardar! Jahiliyat Ka Saara (Zalimana Aur Istehsali) Nizaam Mein Ne Apne Paon Se Rond Dala Hai Aur Aaj Se Nizaam e Jahiliyat Ke Saare Khoon (Qisas, Deeyat Aur Intiqam) Kaladim Qarar Diye Jate Hain Aur Aaj Se Nizaam e Jahiliyat Ke Saare Soodi Len Den Bhi Khatam Kiye Jate Hain.”

          In Do Ailanat Ke Baad Is Amr Mein Kisi Shak Ki Koi Gunjaish Baqi Nahin Rehti Ke Khutba Hujjat ul Wida Fil Haqiqat Ek Naye Nizaam Ka Ailan Tha. Huzoor Ke Farmaeen Se Ye Amr Wazeh Hai Ke Islam Deen e Aman, Mohabbat Aur Rahmat Hai. Aap Ne Hujjat ul Wida Ke Mauqe Par Irshaad Farmaaya: “Allah Ta’ala Ne Tum Par Tumhare Khoon, Tumhare Maal Aur Tumhari Aabruyein Haraam Kar Di Hain Aur In Cheezon Ko Aisi Izzat Bakhshi Hai Jo Izzat Tumhare Is Sheher Mein, Is Mahine Mein, Is Din Ko Haasil Hai. Kya Mein Ne Paigham e Haq Pohncha Nahi Diya?” Sabhi Ne Baik Zubaan Jawaban Arz Kiya, “Ji Haan, Zaroor!” Is Wazehiyat Ke Baad Aap Sallallahu Alaihi Wa Aalihi Wasallam Ne Sab Haazireen Ko Talqeen Farmaayi:

“Suno! Jo Log Yahan Maujood Hain, Unhein Chahiye Ke Ye Ahkaam Aur Ye Baatein Un Logon Tak Pohncha Dein Jo Yahan Is Waqt Maujood Nahin Hain. Ho Sakta Hai Ke Koi Jo Yahan Maujood Nahin, Tum Se Zyada Samajhne Aur Mehfooz Rakhne Wala Ho.”

          Huzoor Sallallahu Alaihi Wa Aalihi Wasallam Ne Apni Hayat e Tayyiba Ke Aakhri Aur Numayan Mauqe Par Aalam e Insaniyat Ko Paigham e Aman Diya Aur Is Amr Ki Pabandi Par Zor Diya Ke Apne Amal O Kirdar Se Qayam e Aman Ko Har Satah Par Mumkin Banayein. Muashray Ko Puraaman Banane Ke Liye Farogh O Iblagh Ka Mujassam Ban Jayein. Ye Ek Haqiqat Hai, Aaj Karah e Arzi Ko Aman O Aman Ka Markaz Banane Ke Liye Mustafa Sallallahu Alaihi Wa Aalihi Wasallam Ke Aata Kardah Manshoor Se Zyada Mo’asar Aur Jame’ Zabta Kahin Aur Dastiyab Nahin.

Hijrat Ke Gyarhween Saal 12 Rabi ul Awwal Baroz Peer Bmutabiq 12 June 632 Aiswi Ko 63 Saal Ki Umar Mein Aap ﷺ Ka Wisaal Zahiri Hogaya Aur Hazrat Syedatuna Aisha Siddiqa Razi Allah Ta’ala Anha Ke Hujray (Ghar) Mein Tadfeen Hui.

(Ref:Seerat Syed ul Anbiya, Seerat Mustafa/Seerat un Nabi ﷺ /Haadi e Aalam ﷺ Wa Deegar Kutub Se Makhoz).