Hazrat Shaikh Salih Samarqandi

حضرت شیخ صالح سمرقندی قدس سرہ

حضرت شیخ صالح سمرقندی غوث العالم  محبوب یزدانی  سید اشرف جہانگیر  سمنانی سے بڑی عقیدت رکھتے تھے اور ہمہ وقت ان کی خدمت میں حاضر رہا کرتے تھے آپ حضرت شیخ علاؤ الدولہ سمنانی قدس سرہ کے مرید تھے اور تکمیل سلوک بھی انہی سے کیا تھا لطائف اشرفی میں ابوالفضائل حضرت نظام الدین غریب یمنی لکھتے ہیں :

درویش صالح سمرقندی شیخ علاؤ الدولہ سمنانی کے ان مریدوں میں تھے جنہوں نے اپنے سلوک کی تکمیل ان کی تربیت میں کرلی تھی ایک مدت تک حضرت قدوۃ الکبریٰ کی رفاقت میں رہے جب قصبہ رودولی سے شیخ سماء الدین کی خانقاہ  سے سمنان جانے لگے تو انہوں نے ان کو خرقہ تبرک عنایت کیا حضرت قدوۃ الکبری سے شیخ صالح کو ایسی عقیدت تھی کہ آپ کے مریدوں اور شیخ صالح میں امتیاز کرنا ممکن نہ تھا۔

(حوالہ: لطائف اشرفی حصہ اول صفحہ394)

اس عبارت سے پتہ چلتا ہے کہ حضرت شیخ صالح سمرقندی کو سید اشرف جہانگیر سمنانی سے بے پناہ عقیدت تھی اگر چہ وہ شیخ علاؤ الدولہ سمنانی کے مرید تھے لیکن عقیدت و محبت  تارک السلطنت سید اشر ف جہانگیر سمنانی سے رکھتے تھے وہ عرصہ دراز تک آپ  کی خدمت میں رہے اورفیوض و برکات حاصل کئے ان کی عقیدت اور والہانہ محبت کو دیکھتے ہوئے سید اشرف جہانگیر سمنانی نے اپنی خاص نظر کرم ان پر فرمائی روحانی نعمتوں سے سرفراز فرمایا ۔  اللہ ان کے مزار میں بے شمار رحمتیں نازل فرمائے آمین۔