Ham Shabeeh e Ghaus e Azam Ashrafi Miyan Qist No. 02

علاوہ برکات باطنیہ و انوارروحانیہ کے محبوب ربانی ہم شبیہ غوث الاعظم شیخ المشائخ حضرت سید شاہ ابواحمد المدعومحمد علی حسین اشرف اشرؔفی میاں الجیلانی رحمۃ اللہ علیہ ایک خاص اعتبار سے محض ظاہر بین آنکھوں کے لئے بھی ایک عجیب تصویر دلکش تھےیعنی آپ کو اکثر مشائخ کرام نے آپ کے جد اعلی محبوب سبحانی ابو محمد محی الدین عبدالقادرجیلانی قدس سرہ سےشکل و صورت میں نہایت مشابہ بیان کیا ہے۔ اس تصدیق ارباب مشاہدہ تو اپنے روحانی مشاہدوں میں کرتے ہوں گے۔ صحائف اشرفی میں ہے کہ.......

 ہم شبــــیہِ غوث الاعظــــــــم

محبوب ربانی شیخ المشائخ حضرت سید شاہ ابواحمد المدعومحمد علی حسین اشرف اشرؔفی میاں الجیلانی رحمۃ اللہ علیہ حلقہ مشائخ کرام میں احسن الوجوہ ہونے کے بنا پر شبیہ غوث الثقلین سے معروف اور جانے پہچانے جاتے تھے  چنانچہ شیخ مارہرہ مقدسہ حضرت قدوۃ السالکین مولانا سید شاہ  اٰلِ رسول مارہروی علیہ الرحمہ نے اعلی حضرت اشرفی میاں علیہ الرحمہ کو شبیہ غوث الثقلین سے یاد فرمایا۔

امام اہلسنت امام احمد رضا فاضل بریلوی علیہ الرحمہ کو جب معلوم ہوا کہ ان کے پیرومرشد حضرت اٰلِ رسول علیہ الرحمہ کی طبیعت زیادہ ناساز ہےتو آپ خود بغرض مزاج پرسی مارہرہ شریف تشریف لے گئے ۔ حضرت آلِ رسول علیہ الرحمہ  اعلیٰ حضرت امام احمد رضا فاضل بریلوی کو دیکھ کر فرمایاکہ میرے پاس سرکار غوث اعظم علیہ الرحمہ والرضوان کی امانت ہے جسے اولاد غوث اعظم میں شبیہ       غوث الثقلین مولانا سید شاہ ابواحمد محمد علی حسین اشرفی کچھوچھوی کو سونپنی اور پیش کردینی ہے اور وہ اس وقت شیخ المشائخ محبوب الہی حضرت نظام الدین اولیاء چشتی رضی اللہ عنہ کے آستانہ پر ہیں ۔ محراب مسجد میں ملاقات ہوگی۔

 چنانچہ الشاہ امام احمدرضا خاں فاضل بریلوی علیہ الرحمہ دلی تشریف لے لائے۔ حضرت محبوب الہی علیہ الرحمہ کے آستانہ پر حاضری دی پھر مسجد میں تشریف لائے تو واقعی پیر کی نشاندہی کے بموجب اعلیٰ حضرت اشرفی میاں کچھوچھوی  علیہ الرحمہ کو محراب ِ مسجد میں پایا اور برجستہ فی البدیہہ یہ شعر کہے:

اشرؔفی اے رخت آئینہء حسن خوباں

اے نظر کردہ و پروردہء سہ محبوباں

اے اشرفی میاں سرکار! آپکا چہرہ انور حسن وخوبی کا آئینہ ہے

آپ   تینوں محبوبین  1؎  کے  پرور  دہ   اور نظرکردہ      ہیں

1.      محبوب سبحانی غوث الاعظم شیخ عبدالقادر جیلانی رضی اللہ عنہ  (بغداد شریف)

2.    محبوب الہی سلطان المشائخ حضرت  نظام الدین اولیاء بدایونی  چشتی  رضی اللہ عنہ (دہلی)

3.    محبوب یزدانی غوث العالم سلطان مخدوم سید اشرف جہانگیر سمنانی رضی اللہ عنہ( کچھوچھہ شریف)

            پھر عرض مدعاکیا۔ اعلیٰ حضرت اشرفی میاں کچھوچھوی نے مارہرہ شریف میں حاضری دی حضرت سید شاہ آلِ رسول علیہ الرحمہ نے سلسلہ عالیہ قادریہ برکاتیہ کی اجازت اور خلافت بخشی اور یہ فرمایا کہ جس کا حق تھا اس تک یہ امانت پہونچادی ۔ اس کے بعد حضرت آلِ رسول علیہ الرحمہ کے اعلیٰ حضرت اشرفی میاں  کچھوچھوی خاتم الخلفاء کہلائے۔                                                                         (صحائف اشرفی)

یہی   نقشہ ہے  یہی   رنگ   ہے  ساماں  ہے  یہی

یہ جو صورت ہے تیری صورت جاناں ہے یہی

ایک شبہ کا ازالہ

اعلیٰ حضرت اشرفی میاں کچھوچھوی علیہ الرحمہ کو آل رسول مارہروی علیہ الرحمہ سے دوئم ماہ ربیع الثانی  1296؁ ہجری کو اجازت و خلافت حاصل ہوئی اور 18/ ذی الحجہ 1296 ؁ ہجری  کو ان کا وصال ہوا، خاندان برکات میں حضرت مولانا سیدشاہ محمد میاں مارہروی نے حضرت مولانا احمد رضا فاضل بریلوی علیہ الرحمہ کو خاتم الخلفاء تحریر فرمایا ہے جب کہ حضرت فاضل بریلوی کو 25/جمادی الآخر 1294؁ہجری میں بیعت کا شرف اور اجازت و خلافت کی نعمت حاصل ہوئی۔                   (حیات مخدوم الاولیاء )

تضمین

برشعر امام اہلسنت مجدد دین ملت  اعلیٰ حضرت امام احمد رضا  فاضل بریلوی قد س سر ہ النورانی

ازقلم: مظہر غزالی، یادرگاررازی،مفتی سواداعظم رئیس المحققین،امام المتکلمین تاجداراہلسنت شیخ الاسلام والمسلمین سلطان المشائخ علامہ سید مدنی اشرف اشرفی الجیلانی اخترؔ کچھوچھوی صاحب قبلہ دامت برکاتہم العالیہ

اندریں محفل کن اندبسے لالہء رخاں

نازشِ  کا ہکشاں  ،   غیرت  ماہ   تاباں

لیک  مثل  تو ندیدم  بہ   نگاہ  حیراں

اشرفی اے رخت آئینہء حسن خوباں

اے نظر کردہء       پروردہء   سہ محبوباں

میرے افکار کی زینت میرے اشعار کی جاں

عالم   تیرہ    و  تاریک    کے   مہر     رخشاں

دیکھ  کر  تجھ  کو   تواسنج   ہوئے  ماہ و شاں

اشرفی اے رخت آئینہء حسن خوباں

اے نظر کردہء       پروردہء   سہ محبوباں

ہررگ و پے میں مئے خلق نبی ہے رقصاں

پھوٹتی ہے  رخ ِ انور  سے  شعاع ِ  جیؔلاں

غمزہء    ناز   ہے   ادائے    سمنؔاں

اشرفی اے رخت آئینہء حسن خوباں

اے نظر کردہء       پروردہء   سہ محبوباں

لب ہیں برگ گل گلزار حبؔیب  رحماں

آنکھ ہیں نرگس رعنائے غزال  جیؔلاں

اور رخسار حسیں  ساغر   آب   رُمّاں

اشرفی اے رخت آئینہء حسن خوباں

اے نظر کردہء       پروردہء   سہ محبوباں

تیراسر، ناز کرے جس پہ کلاہ عرفاں

تیرا در، آکے جہاں خم ہو نعیم دوراں

تیراپا، جس کا زمانہ ہے رہیں  احساں

اشرفی اے رخت آئینہء حسن خوباں

اے نظر کردہء       پروردہء   سہ محبوباں

تیرا باطن ہے میرا  کعبہ  دل  قبلہ  جاں

تیرے ظاہر پہ ہے آئینہ  بھی محو حیراں

کیوں نہ پھر بول اٹھے اہل بصیرت کی  زباں

اشرفی اے رخت آئینہء حسن خوباں

اے نظر کردہء       پروردہء   سہ محبوباں

تیری تخصیص نہیں اخترؔ آشفتہ  بیاں

کتنے اختر  ؔ ہیں  نشید آرا   ترنم  ریزاں

دیکھ خود شیخ رضؔا بھی ہیں گوہر افشاں

اشرفی اے رخت آئینہء حسن خوباں

اے نظر کردہء       پروردہء   سہ محبوباں

(تجلیات سخن)