حضرت شیخ ابوالفرح محمد یوسف طرطوسی علیہ الرحمہ

 

اسم گرامی: شیخ محمد یوسف

لقب: راحت المسلمین

کنیت: ابو الفرح

والد کااسم گرامی: شیخ عبدا للہ طرطوسی علیہ الرحمہ  ۔ شام کے خوب صورت شہر ’’طرطوس‘‘ کی نسبت سے’’طرطوسی‘‘ کہلاتے ہیں۔

تحصیل علم: آپ مروجہ علوم اسلامی کے ماہر کامل اور فاضل متبحر تھے۔علم الاخلاق اور تصوف میں امام تھے۔

بیعت وخلافت: حضرت شیخ عبد الواحد تمیمی علیہ الرحمہ  کےدستِ حق پرست پر بیعت ہوئے، اور مجاہدات و سلوک کے بعد خلافت سے مشرف ہوئے۔آپ حضرت شیخ عبدالواحد تمیمی علیہ الرحمہ  کے اجل اور اعظم خلفاء میں سے ہیں۔

سیرت و خصائص: آپ علیہ الرحمہ  سلسلہ عالیہ قادریہ امام اورشیخِ طریقت ہیں۔ آپ علیہ الرحمہ  ولی کامل اور عالم وفاضل جمیع علوم ظاہری وباطنی ہیں۔ آپ علیہ الرحمہ  بہت بڑے صاحبِ کرامت بزرگ تھے۔ اور صبر وتوکل میں آپ کامقام بہت بلند ہے۔ زمانے کے علماء ومشائخ نے آپ علیہ الرحمہ  کومنفرد وقت جانا اور مانا ہے، آپ علیہ الرحمہ  عظیم خوبیوں کے مالک تھے، اور اپنے پیرومرشد کے نقش قدم پر رہ کر خلق خدا کی ہدایت کا عظیم فرض انجام دیا اور دین متین کی وہ خدمات انجام دیں کہ آج بھی آ علیہ الرحمہ  پ کانقش قدم فیض روحانی کاسرچشمہ ہے، تجریدو تفرید میں یگانۂ وقت تھے۔شہر طرطوس ملک شام کے عمدہ ترین شہروں میں سےایک بہترین شہر تھا۔ آپ نے اس شہر کواپنے قیام کے لئے منتخب فرمایا اوراسی شہر میں بودو باش اختیار فرمائی اس لئے آپ طرطوسی کہے جانے لگے ۔ اس شہر میں آپ نے قیام فرماکرصفحاتِ سِیر پر اس کے نام کو بلند فرمادیا اوراس کے مجہول نام کواوج ثر یا پر پہنچا دیا ۔ سچ ہے کہ جوزمین کسی مردِ خدا کو مقتدا نہ طور پراپنی آغوش میں لے لیتی ہے تووہ زمین باعثِ تعظیم ولائق تقدیس ہوجاتی ہے۔ اس کے نظائر ہمیں بہت سے شہروں اور مقامات میں نظر آتی ہیں۔چھوٹے چھوٹے گمنام قصبےدنیا میں ان نفوس قدسیہ کی بدولت مشہور و مقبول ہوجاتے ہیں۔میرے سامنےاس کی ایک نظیر پاکستان کا ایک دور دراز اور پسماندہ علاقہ ’’تونسہ شریف‘‘ بھی ہے،جو اکیسویں صدی میں بھی بنیادی انسانی ضروریات سے محروم ہے، لیکن اس کا نام پیر پٹھان حضرت شاہ محمد سلیمان تونسوی کی بدولت پوری دنیا میں روشن ہے۔اس طرح کی بےشمار مثالیں دنیا میں موجود ہیں۔

تاریخ وصال: آپ علیہ الرحمہ  کاوصال 3؍ شعبان المعظم بروزہفتہ 443 ہجری، مطابق 27؍ اکتوبر 1055ء کو خلیفہ القائم بامرا للہ عباسی کے عہد میں طرطوس میں ہوا۔

خلفاء: آپ علیہ الرحمہ کے صرف ایک خلیفہ کانام کتب سیر ملتاہے جوحضرت شیخ ابو الحسن علی ہکاری ہیں ۔

مزار مبارک: آپ کامزار مقدس شام کے شہر طرطوس میں مرجع خلائق ہے۔