کلام : محبوب ربانی ھم شبیہ غوث الاعظم حضوراعلیٰ حضرت اشرفی میاں کچھوچھوی قد س سرہ النورانی

 

Aala Hazrat Ashrafi Miyan Alahirrahmah

غم فراق سے رہتی ہے انتشار  میں  روح
جووصل ہو تو رہے شاد جسم زار میں روح

نہ  قبر    پر    بھی    اگر  بعد مرگ    آیا     تو
رہے گی تیرے ہی تا حشرانتظار میں روح

سنا    دے    مژدہ     دیدار    جلد    اے   قاصد
 بہت دنوں سے تپاں ہے فراق یار میں روح

نہ سخت   ہاتھ   لگاؤ  سنبھل    کے   شانہ   کرو
چھپی ہے کاکلِ مشکیں کے تار تار میں روح

طبیب      دیکھ       کے      بیمارِ     عشق      کو     بولا
بس اک حباب سی باقی ہے جسم زار میں روح

اگر   نہ   آئے   عیادت   کو   وقت   نزع  بھی  تم
          تڑپ تڑپ کے رہے گی مرے مزار میں روح

خبر   نہیں    تن    لاغر    کی    اشرؔفی    ہم  کو
بھٹکتی  پھرتی  کہیں  ہوگی  کوئے  یار  میں روح

(تحائف اشرفی/حضور اعلی حضرت اشرفی میاں کچھوچھوی علیہ الرحمہ )